ودي بس مااعرف

السلام عليكم


ووودي اعرف اطبخ بس احس اني مااعرف يحتاج لشغل ووواجد
شنووو اهم شي اعرفه عشان يكووون صبخي مضبوووط
ياليت اقدر اتعلم منك واعرف طبخااات يمدحني فيها زوووجي

بس مشكلتي فاشله بالطبخ شنو الحل براااايكم

هلا حبيبتي والله الطبخ سهل مايبيله شي

انا عكسج اعرف بس مالي خلق اتعب نفسي ههههههههههههه

ترى المجبوس والله سهل حده والمرق بعد سهل

اي شي تبين تسوينه عطيني خبر ومن عيوني اساعدج وان شاء الله تكون حلوه الطبخه

وفي بعد خفايف حق العشا مثلا الهمبرجر تحطين عليها خطات يصير شكله مميز وحلو وغريب

اي نوع طبخ حابه تطبخين قولي لنا وماراح نقصر وياج

مشكووووووووووووره ياقلبي

شررايج ابدي بطبخ سهل من فكررررتج :wink_smile:


ووودي اتتفنن بطبخ ومدحني زوووجي

من عيوووني اسااعدج باللي تبين

بس انتي حددي شنو تبين تعرفين وانا اساعدج :wink_smile:

واكيد البنات مايقصروون

وجبة غداء بس ماتكووون فيها عيش

هههههههههههه عاد انا احب اطبخ العيووش

ليش ماتبين العيش يعني حسبالج صعب اذا حسبالج صعب فأنتي غلطانه اسهل شي

وربي اسهل من الخفايف .. واول المشي حبيان يعني الامور سهالات

ماعلي منج باجر تسوين مجبوس دجاج كيفي ههههههههه << بدت تتحكملا صج وربي سهل بس انتي خلج وياي خطوه بخطوه وماراح تندمين

ترى وربي ماابالغ بس مجبوسي الكل يخبه :shades_smile: هههههههههه كلش غوزي


.....................................................................


شوفي بقولج المكونات لج انتي وزوجج بس واذا زياده عاد انتي زيدي :

ثلاث بصلات تقصينهم ناعم , ثوم راس واحد ,,طماط نص دجاجه , عيش على حسب نظرج ,
البهارات : بهارات اللي قوطيهم اخضر ابو سفينه اذا مالقيته اخذي بهارات الدجاج ,كركم
هيل , لومي اسود , فلفل اسود ,
خلطه انتي تسوينها : فلفل اسود وهيل ودارسين ومسمار تطحنينهم ويابعض << تخلينها بعلبه عندج على طوول .

الطريقه :
اول شي

تحمسين البصل والثوم لين يتغير لونهم بس مويصير اشقر غامج لا شوي يذبل

بعدها تحطين بقفشه اللي اكبر من الحوس > نص بهار المجبوس ونص كركم ونص من الخلطه
وقفشه هيل ونص فلفل اسود وتقعدين تحمسين وبعدين تحطين فوقها الدجاجه بعد ماتنظفينها
طبعا وتحطين علوب فلفل حار وتحطين ليمونه بدون ماتقصينهم على عدالهم
وبعدين تحطين الماي فوق الخلطه طبعا جدرج صغير ويكون الماي تحسين انترس بس باقي اصبعين
وتغطينه تحسبين له ساعه الا ربع بالضبط تطلعين الدجاجه وواذا عندج مشخال تنظفين ماي الدجاج
من البصل والثوم وبعدين تكتين العيش عليه وتشيلين من الماي تخلين الماي بمقداراصبع فوق العيش وبعدين تغطينه واذا شفتيه تطابخ قصري عليه وحطي الحشو فوقه وغطيه بقصدير
وخليه على نار هاديه بعد خمس دقايق بطليه اذا حب زيدي عليه من ماي الدجاج اللي شلتيه قبل شوي وردي غطيه بالقصدير .

وطريقة الدقوس :
تحطين دهن بالجدر وتحمسين الثوم وبعدها تحطين معجون طماط واحد وتحمسينه بعدين
تحطين الطماط وفلفل اسود ولومي وملح وتضيفين بياله ونص ماي وغطيه خمس دقايق
وشوفي شكله اذا ثقل يعني خلص .

وطريقه دقوس ثاني اذا تحبون الفلفل هذا حلو سويه طبق اضافي:
تحمسين الثوم وبعدها تحطين الطماط >> بدون معجون << وفلفل اخضر وفلفل احمر
وعصير ليمون شويه وفلفل اسود ولومي وماي بياله وحده وبعدها حطيه بالخلاط
راح يصير لونه برتقالي وبعدين مره ثانيه تحطين دهن شوي وتحطين اللي بالخلاط
وتنطرين عليه شوي لين يثقل بعد .

وطريقه الحشو :
تحطين البصل بروحه بالمقله لما تشوفين بدا يطلع لون بني حطي رشه ماي عليه
راح يتغير لون البصل ولما ينشف الماي تحطين دهن شوي وتحمسين وبعدها فلفل اسود
ولومي وصبغ عيش بطرف القفشه .

.....................................

شوفي بنفس وقت اللي تحطين الدجاجه مو تنطرين ساعه الا ربع بهالوقت

سوي الدقوس والحشو ونقعي العيش وغسليه عدل .

................................

واي سؤال انا حاضره وترى محد طلع من بطن امه عالم

ولازم تخطين خطوه لو صعبه ببدايتها تصير سهله بعدين

ماتدرين يمكن تفتحين مطعم هههههههههههه

اي شي مستعجل تبينه دزي لي ع الخاص اذا مارديت عليج

وحاظرين للطيبين:wink_smile:

واذا سويتيه قولي لنا شلون طلع

وان شاء الله يبيض الوجه

يامال العافية ياقلبي انشاء الله بسويها يووم الجمعه عشان عطله وأنشاء الله اظبطها دعووواتج

انتي قدهاا ان شاء الله وبتسوينها

وانطر ردج اذا سويتيها :teeth_smile:

نفس الحاله
وامس ريلي مشتهي عيش بالاشبنت
وماكو فايده احس مخي وقف
ياربي لازم الرياييل حريمهم يطبخون ؟
بيموتون اذا زوجاتهم ماطبخو ؟؟

لا ولازم عيوش
؟
ساعات يكسر خاطري واسوي له
اشياء خفيفه

ودايما يقعد يحن يقولي طبخي
وانا حرب بيني وبين المطبخ
اصلا ماعرف حتى اشلون اشخل عيش
ماعرف اشلون اغسل الديايه
زين مني اعرف بيض

الله يعينا يارب وانعرف نطبخ حق رياييلنا
مو جني قرقت وايد ههههههه:teeth_smile: