اللقيمات>>> سهلة بس تحملوني عالشرح

السلام عليكم حبايبي... انا شاركت بنفس الموضوع بس بقيت _:wink_smile:(((احطه مرة ثانية))) للاستفادة..


عندي لكم لقيمات سهلة بلا مكونات ولا شيء والله انا قبل كنت اسوي لقيمات تجنن قبل لا اتزوج... وكنت استخدم لقمة القاضي و احط معاها روب واسويها... والله كل من شافهم قال هذا شغل محل حلويات...
وبعد فترة سبحان الله مايظبطون وياي بالمره...
يعني اما يابسه او تكون عجينة و غامجه من جهة وحدة.. وبيضه من الجهة الثانية...
بس الحمدلله رجعت اسويها مثل قبل واحلى واللــــــــــــــه ... بس هالمره والله ما استخدم شيء بالمره... يعني بس كرتون لقيمات العلالي وبصراحة صج تطلع روعه.. ودايما اسويهم خصوصا ان زوجي دايما يبيهم حتى بعد الفطور.. و اهلي حتى لوماجيت لهم لازم ادزلهم برمضان يوميا وبيت اهل زوجي >>> كلهم بعد يحبونها.. ولي تفطرنا عندهم يقولون لا تنسين اللقيمات...
ومايتفطرون الا عليها... ولا ترا اسوي كرتونين لزوجي واهلي... والله كل من ذاقهم يشهد انها احلى لقيمات ذاقهم بحياته..

وهاذي الطريقة بالتفصيل الممل... شوفوا حبايبي...

اخذ ((1)) كرتون العلالي واحط عليه الخميره مالته واخلطها مع الطحين قبل لا ازيد الماي... وبعدين احط عليهم ماي فاتر شوي دافي عشان يتخمرون احسن ..المهم كمية الماي لكل كرتون>>>>>كوب وربع (( القلاص العادي اللي يبيعونهم بالجملة بكيس وسعرهم بدينار1 ويجيج عريض من فوق وضعيف من تحت ولونه مائي وعليه رسومات ورود او نقوش من تحت اتمنى انكم عرفتوه)).. واخلطهم بايدي لمدة دقيقة بس حيل شوي>> بشكل دائري و ارفع العجينة وانزلها نفس الضرب.. ملاحظة العجينة تصير لا هي خفيفة ولا ثقيلة حيل.. يعني مايلة للثقل شوي.. واغطي الوعاء بكيس نايلون واربطه.. واترك العجينه بمكان دافي على طاولة المطبخ لمدة من 30 _ 45 دقيقة..... وبعدها اجهز مقلاة الغلي وتكون عميقه (( انا استخدم مثل مالت اليابانيين)).. واحط فيها زيت غزير (( ملاحظة الزيت هذا اخليه خاص للقيمات لكذا مرة استخدمه بس لازم اشخله بالمشخال قبل لا استخدمه مرة ثانية ))... واتركه لحد ما يصير حار جدا بس مو يدخن ... وبهالفترة هذي اجهز لي طاسه او ماعون شوربة صغير واحط فيه شوي ماي ... واجهز ملعقة كبيرة>> (( ملاس )) ويكون مشخل ... واجهز مشخال واحط تحته صحن...
وبعدها لما يجهز الزيت ويسخن اوطي على النار للاخر.. وبعدها اغط ايدي بالماي شوي واخلط العجينة مرة ثانية واخذ باطراف اصابعي شوي من العجينه على شكل كره >>> لاهي كبيرة ولا صغيرة و طبعا انتي راح تعرفين حجمها بعد ماتخلص اللقيمات يعني اذا كانت كبيرة صغريها والعكس.. المهم بعد ماناخذ العجينة باطراف الاصابع على شكل كره لازم امسح بها يمين ويسار على طرف الوعاء من تحت لي فوق علشان تصير مدوره حيل وبعدين سيدا اسقطها بالزين بهدوء مو حذف ولازم تكون ايدي قريبه للزين.. وبسرعه اكرر الطريقه احط ايدي بالماي وانثر الماي منها واخذ العجينة مرة ثانية واكرر الخطوة اللي قبلها واذا امتلت المغلا يعني سطحها طبعا اعلي على النار مرة ثانية مع التحريك المستمر المستمــــــــــــــر .... واقلبهم واالتحريك بشكل دائري لحد مايتحمرون.. واشيلهم واحطهم بالمشخال..... واوطي على النار مرة ثاني.. واكرر الخطرة السابقة لحد ماتخلص كمية العجينة... وبعدها اخذ اللقيمات واحطهم بجدر كبير واصب عليهم الشيره ((القطر او العسل)) ربع قلاص تقربا...
و انا استخدم الشيره الجاهزة اللي بالجمعيات حلوة وطعمها حلو اللي لونها اصفر بالزعفران... مو الشفافه....واحركهم بايدي بشكل دائري وفوق وتحت لحد ماتلزق الشيره عليهم عدل..
وبعدين اجيب سمسم اللي شوي محمص..طبعا على حسب الذوق اللي يحب السمسم.. وصدقوني حلوة>>> اخذ سمسم مقدار
1 م.ط او اكثر شوي لكل كرتون.. وانثره باليد وارد احركه وبعدها اوزعه بالصحون او بصحن حلو كبير للتقديم .... وبالعافية جربوها ماراح تندمون ... ادري طولت عليكم بس شسوي والله اتمنى لكل وحدة عرفت طريقتي تستفيد منها وان شاء الله تضبط معاهها..

ابي دعواتكم بالذرية الصالحة... اللهم لاتذرني فردا وانت خير الوارثين...

alprincess>>> البرنسيســه R