ابي المعارض الفاتحة لشتاء الحين

بسم الله الرحمن الرحيم

السلام عليكم ورحمة الله


بنات ياليت اللي تعرف أي معرض من المعارض الموثوقة حق الشتا ( حتى لو فيه الحين بمشرف ارض المعارض مسموح نحجز توضح لي ) تكتب اسمه ورقم تلفون الأتصال عليهم واذا تعرف اسعارهم تخليها وكم يوم المعرض وكل التفاصيل


نبيه للفترة ما بين 24-11-2011 إلى 10-12-2011 مانبي كل الفترة بس نبي ننزل معرض خلال هالفترة يعني


ملاحظة : ما أبي معرض عنده شروط لازم اللي تبيع تكون من عندهم أو اللي تبيع تكون جنسيتها كويتيه لأني بأنزل بنات جنسيتهم عربية

ومشكورين يا حلوين مقدما

اختكم

يعطيج العافية

وانا ادور معارض تكون اسعارها معقولة غير معرض افكاري

اشووواق كتبت:يعطيج العافية

وانا ادور معارض تكون اسعارها معقولة غير معرض افكاري

بسم الله الرحمن الرحيم

الله يعافيج أختي

ايه ان شاء الله نلقى معارض زينة غير افكاري ( ينطبق عليهم المثل يبون يطببونها عموها المحتاجين أنهم يعرضون عندهم موقادرين بسبب شروطهم ) انتظر معاج يمكن احد يعرف معارض مناسبة وماعندها شروط تعجيزية


اختك

اشووواق كتبت:يعطيج العافية

وانا ادور معارض تكون اسعارها معقولة غير معرض افكاري

والإيجارات عندنا وايد معقولة
الإسبوع اللي من 24/11 سعر الحجز فيه 50 دينار لمدة اسبوع كامل
مع توفير خدمات مثل الإعلانات والطاولات والشبك وخدمة التنزيل والتحميل
وكذلك الحجز الدائم تحجزين محل لمدة شهر في سعر تاخذينه في3 ايام عند اي مكان ثاني

كرنفال C.A.P.S oN
بجامعة الخليج
تاريخ ١٤ و ١٥ ديسمبر

شاركونا بمواهبكم ؛)

للحجز او الاستفسار :
يمنع وضع ارقام هواتف وايميلاتاهوا مثل معرض تقدرين تبيعين فيه شغلج ايا كان
وراح يكون فيه حضور كبير من طلبة الجامعه وبرا الجامعه وحتى راح يكون فيه عروض ومسابقات

السلام عليكم خواتي .. انا اسوي معارض في بيتي بمنطة العدان ( القسايم ) و الصالة رااااقية الحمدلله و مرتبة .. و الناس اللي تيي شرايه .. و اللي حابة تشترك عندي معرض يوم الخميس - الجمعة - السبت من تاريخ 1- 12-2011 لمدة 3 ايام ب 30 ديناااااار ( يعني سعر رمزي جدا )

للي حابه تتواصل تطرشلي مسج عالخاص لان مايصير احط رقمي حسب شروط المنتدى اللي ميمعنا وياكم على خيير :)

و ان شاء الله الكل يستفيد ..

السلام عليكم

ياهلا أختي أفكاري

أكيد المعارض تختلف سواء مؤقته أو فصليه أو دائمة ، حتى المنظمين وطريقتهم وأماكن المعارض وشهرتها والأعلانات وغيره كله يختلف من مكان لثاني

أنا أتكلم عن نفسي لما قلت تعجيزيه مع أني من زمان حابه أشارك بأفكاري اللي المفروض تدعمنا ككويتين وبدون لكن اللي نشوفه من شروطهم يخلي الواحد يعجز يشارك معاهم .. ما أدري عن كلمة متساهلين مع المشاركين!! ويمكن بالمستقبل أقدر أشارك معاكم الله أعلم .

وقولتج توفرون مساعدة هذا ما نبيه شنبي بالفلبينية أو غير العربية اللي ما تفهم شغلنا وتاخذ فلوسنا على كل يوم مو بلاش وفوقه تقعد بس تضحك وتسولف مع هذي وذيج من ربعها وهذا مو كلامي ترى كلام وايد شاركوا معاكم وكلام زوار لما حبوا يشوفون المعرض كيف طريقته ... احنا لما نبي نخلي بنت تقعد مكانا ونعطيها فلوس نبي نضمن أنها تشتغل عدل وبذمة وضمير وتبيع بضاعتنا عدل وتفهم بالشغل اللي احنا مسوينه علشان تجذب ال**اين مو تطفشهم وهذا ما توفرونه انتم باللي راح تخلونهم ونعطيهم فلوس على الفاضي .

حسبيها معاي اختي 50 او 60 تاخذونه وفوقه وحدة ما تبيع شغلنا وتاخذ على ال6 أيام 30 هذا لو قلنا نعطيها 5 دنانير باليوم .. النتيجة شنو ؟ 90 دافعينها لكم ونطلع حتى ما بعنا قيمة ال 90 قيمه اللي دفعناها والسبب الشروط اللي اعتبرها تعجيزية حق اللي تبي تترزق الله بالحلال مثلنا ( ربح من نص دينار إلى 2 دينار على الشغلة وكلش كلش ماتزيد على 5 لو شغله يدوية ومتعوب عليها وايد ) مو اللي تبي تتاجر بضاعتها نص دينار او دينار وتبيعها فوق العشرة دنانير .

نبي معارض بس للحريم يدخلونها
نبي معارض ما تشترط علينا اهم الي يوظفون اللي تقعد مكانا
نبي معارض ما تشترط جنسية كلنا أوادم ومحتاجين ومافيه فرق بين جنسية وثانية
نبي معارض ارضيتها معقوله وخدماتها اللي توفرها
هذا كله نبيه اذا فعلاً أفكاري وغيرها يبون يدعمون الشباب البدون والكويتي !


أتمنى فهمتيني عدل
أنا ما انتقد افكاري وغيرها بس فعلاً يحز بالنفس لما نلاقي شروط تخلي الناس اللي تبي تترزق الله بالحلال ماتقدر تشارك

الله يوفقكم

fo0o7a كتبت:كرنفال c.a.p.s on
بجامعة الخليج
تاريخ ١٤ و ١٥ ديسمبر

شاركونا بمواهبكم ؛)

للحجز او الاستفسار :
يمنع وضع ارقام هواتف وايميلات اهوا مثل معرض تقدرين تبيعين فيه شغلج ايا كان
وراح يكون فيه حضور كبير من طلبة الجامعه وبرا الجامعه وحتى راح يكون فيه عروض ومسابقات

بسم الله الرحمن الرحيم
السلام عليكم أختي الفاضلة

هذا الكرنفال مدته بس يومين ؟
طيب كيف نحجز مكان فيه ؟ وشنو اللي يوفرونه ؟ اذا لهم طلبات خاصة كشروط للتسجيل شنو تكون ياليت تفيدينا بها ؟
مدة العرض .. صبح وعصر لو وقت واحد ومن أي ساعة .

اذا ما عليك كلافة ياليت تخلين رقم المسؤول عن الحجز واسمه بالرسائل الخاصة أو تحاولين تنشرين الموضوع بمنتدى ثاني اقلها نشوفه بالنت ونعرف خبره .. معرض اكيد له رقم هاتف وايميل بس المشكلة لما قانون المنتدى يمنع نشره!!

مشكورة على الرد

اختك

chic_picks كتبت:السلام عليكم خواتي .. انا اسوي معارض في بيتي بمنطة العدان ( القسايم ) و الصالة رااااقية الحمدلله و مرتبة .. و الناس اللي تيي شرايه .. و اللي حابة تشترك عندي معرض يوم الخميس - الجمعة - السبت من تاريخ 1- 12-2011 لمدة 3 ايام ب 30 ديناااااار ( يعني سعر رمزي جدا )

للي حابه تتواصل تطرشلي مسج عالخاص لان مايصير احط رقمي حسب شروط المنتدى اللي ميمعنا وياكم على خيير :)

و ان شاء الله الكل يستفيد ..

بسم الله الرحمن الرحيم
وعليكم السلام ورحمة الله
ياهلا أختي .. صار لك كم سنة تسوين المعرض ؟ وشنو اسم المعرض هذا ؟
تسوون دعاية واعلان قوي له لو لا؟
فترته من أي ساعة لأي ساعة ؟ وفيه صبح وعصر لو فترة وحدة؟
شنو توفرون كطاولة وغيره من أمور للي تشترك؟
ياليت أختي تفاصيل أكثر .. أو ترسلين اسمك ورقمك برسالة خاصة علشان نتصل ونفهم أكثر عن المعرض هذا.

وشكرا

اختك