ام
ام يوسف الكويت
2010/07/16 · #1
السلام عليكم
شلونكم يا حلواااااااااااااااات
انا صارلي فتره ادور على حريم يطبخون اكل نفاس .. وكنت افرفر بقوقل وافرفر بالمنتديات واسأل وطبعا لقيت ما اقولكم ما لقيت .. دقيت على اكثر من وحده وقلت اجربلي طبق او طبقين واشوف نفسها بالطبخ .. لكن .. صراحه بعضهم نفسيه والاكل الله يزيد النعمه انا كنت اطلب اكثر شي ورق عنب .. استغفر الله بعضهم انصدمت من الطعم مو نفس اللي كنت متخيلته وتلاقينها مادحه شغلها موصلته لي السما وله حاطه رفيجاتها او اهلها يمدحون فيها .. ولي ييتي جربتي تنصدمين من الكميه القليله والطعم .. هذا غير انه غالي وضيفي عليه عمولت توصيل .. :emoticon_U:
واذكر اني مره طلبت من وحده وماعجبني وايد وعطيتها ملاحظتي لكنها زعلت مني وعصبت وراحت كلمت ادارة المنتدى وخلتهم يحذفون ردي شدعوى يعني ما تتقبلين ملاحظات الناس ؟؟ شحقه عيل صايره تاجره ؟؟ :mskket:
المهم مابي اطول عليكم ... <<< قالت قصت حياتها خخخخخخخخخخ
عاد قبل جم يوم سئلت بالمنتدى عن نفس الموضوع وقالتلي زميلتي اهات الليل فديت قلبها .. قالتلي عن مطبخ عواشه ومدحتها حيل ومدحت اسعارها وانا قلت يله خل نجربها حالها حال غيرها بعدين نحكم
لاني صراحه بسوي اشتراك فا قلت بجرب قبل ما اقط فلوسي واتحسف نفس المرات اللي طافو
ودقيت عالمرى بليل متأخر وكنت مفتشله منها لاني داقه متأخر وهي رحبت فيني وكلمتني بنفسيه حلوه وردت على استفساراتي بكل رحابة صدر فديتها وفديت اسلوبها العسل
المهم قتلها اني ابي اطلب وقالتلي بكل ثقه انها تبي تدزلي طبقين على ذوقها وانا قلت دامها واثقه من نفسها خل نشوف ؟؟ وقتلها اوكي
على اساس اليوم يعني راح يوصل غدانا .. طبعا انا قتلها ابي حق شخصين لي ولزوجي ..
ووصل اليوم غدانا الساعه 1.20 وحده وثلث عالموعد تقريبا بس تاخر عشرين دقيقه ههههههههه
وكانت دازتلي مجبوس دياي .. + رولات الدياي بالكريما << اهي تسميه اصابع الدياي بالكريما
يلا نشوووووووف الصور :)
طبعا وانا اصور وريلي مناشبني قاعد ياكل مو راضي يصبر ههههههههههههه
هذي صينية المجبووووس اول ماوصلت ... واللي فوقه معبوووج شنو حااااااار .. سيده رحت ركض يبتلي قلاص ماي بارد لوول
..
وهذا الطبق الثاني .. اصابع الدياي بالكريماا
..
وهذا الدقووووس <<< من ملحقات المجبوس :)
شوفو ارتفاع الماعون
..
يلا نفتح المواعين بسسسسسسسسم الله
صراحه انا انصدمت لان الاكل ماشالله راهي وانا قايلتلها ان احنا شخصين يعني شوفو بنفسكم المرى محلله فلوسها بذمه وضمير وطبعا حسبته لي ب 6 د.ك
الطبق كان عيش فوقه طبقت حشو ثقيله اقصد راهيه ( بصل + كشمش + صنوبر + نخي ) + 1 ديايه ومن كثر ماكان الحشو راهي حمواتي تضايقو منه خخخخخخخخ
و اهم شي ان الديايه ريحتها حلوه مو زفره انا عقدتي اذا صارت الديايه زفره بس اشوى شميت الديايه زينه ريحتها هيل وبهارات ههههه
...
وهذا الطبق الثاني اصابع الدياي بالكريما ماشالله شحلاتها تررررفه اذكر اني سويتها رمضان اللي فات بس طلعت محروووقه وصارت بسكوت بالدياي هههههههه
وحسبته لي ب 6 دنانير
طبعا كانت الحشوه عباره عن دياي ومشروم وجزر مبشور وصج كانت وااااو
...
هذا الدقوووس ماشالله راهي وشحلات ريحته وثقيل الدقوس مسويته بضمير مو مثل المطاعم يسوونه ماي مايوه !!
.....
طبعا الاكل كان راهي حيل ووالله العظيم بس هذا اللي اكلناه انا وريلي اكلنا ليمن شبعنا ولا كأنه كلينا منه شي.. واثنينا كلينا بس الصدر يعني ربع ديايه :) وريلي ياكل ويقول اممممم اقوله شفيك حرقك المعبوج ؟ يقولي لا الاكل لذيذ ههههههههههه عليه بالعافيه
وتوهقت بالاكل وايد وله ريلي يقولي خشيه حق عشانا قتله من صجك هذا راح يزيد حق 3 ايام هههههه المهم دقيت على حماتي قتلها صعدي عندي بدزلكم غدى وقالتلي ييتي بوقتج تونا قاعدين وماتغدينا لوول المهم نجبتلهم وحطيتلهم نص ديايه ترست قنجتهم وماشالله ظل العيش راهي وخشيت حق ريلي حق العشا بعد ههههه بقت ربع ديايه ( الفخذ كامل+ عيش )
طبعا دقت علي حماتي تتشكر وقالتلي وااااي تسلم ايدج شحلات طباخج هالمرّه وانا مت من الضحك قتلها مو انا اللي طابخه ..طالبته من وحده وقامت تمدح الطباخ واستانسو عالعيش بس قالولي تضايقنا من الحشو وايد هههههههههه
....
وهذا حال اصابع دياي بالكريما والله ظل مثلما اهو لان شبعنا من العيش ريلي هد هالطبق وطاحله بالعيش بالخمس وايد عجبه .. وكلا حبه وحده من الاصابع وانا كليت ثنتين وودي اكل بس انترس بطني ماقدرت لووول
كنت بحط حق خواته بس قالي لا تحطينلهم انا ابيه عالعشا لاني الحين مو قادر اكل ههههههه
قتله اوكي
وبس قتلكم قصت حياتنا لوووووووووول بس للأمانه نقلت لكم تجربتي بللي شافته عيني وبللي ذقته بنفسي .. والله يشهد اني ما اعرف هالمرى مو تقولون مسويه دعايه حقها وربي يشهد ماعرفها واللي دلتني عليها اهات الليل اهي عضوه معانا وثنتينا اتفقنا نطلب منها بنفاسنا شهر 10 والبنات وصوني اصور الاكل واحط تجربتي وهذا انا وفيت بوعدي
حسابي طلع .. 14 دينار
حسبتلي المجبوس ب 6 دنانير
واصابع الدياي بالكريما ب 6 دنانير
والتوصيل دينارين
يعني المجموع 14 دينار
ويا ليت اللي جربت طباخ ام عواش مال النفاس تكتب تجربتها او تعلييقها او رايها خل نستفيد
سي يوو حبيباتي واتمى الصور والتقرير عجبكم :)