عندي عدة مشاكل في البخ ياريت الطباخة تفيدني

تبارك الرحمن كتبت:

السلام عليكم ورحمة الله وبركاته

وعليكم السلام والرحمه


حبايبي عندي عدة مشاكل في طبخي

اول مشكلة :

اني ما اضبط المرق يعني بسوي مرق بطاط مع دياي ، او بسوي مرقة ربيان كلش مايضبط
احس يصير ماصخ وجنة ماي يعني ماله نكهة معينة
شنو اسوي وشنو البهارات الي استخدمها


اختي الغاليه اذا كنتي تبين تسوين مرق دجاج اولالا لا تسلقين الدجاج بالاول لاء نظفي الدجاج وقطعيه وبعدها جيبي بصل وشوحيه شوي وحطي الدجاج وخليه شوي يعرق مثل مايقولون بعدها اضيفي بهاراتج وهياا بهارات الدجاج جاهزه واخذي بهارات من الجمعيه اسم الماركه ماجدولي

واضيفي عليه ورق غار وثوم ولومي دائره وحطي بطاط وخضرتج اذا حابه حتى كوسا وبامياا

وبعدها اخلطيهم كلهم مع بعض وحطي الملح حاولي تحطي ملعقه اكل وحده اذا كان الجدر صغير او متوسط

وبعدها سكري الغطا عليه وخليه شوي تشمين الريحه الطيبه

بعدها حطي معجون طمام وضيفي الماي ولكن لا تترسينه كل الجدر لاء تشوفين الماي صار فوق الدجاج شوي

وخليه بعدها شلون يصير ناضج اغرسي سكينه وحاولي تذوقي الاكل اذا يحتاج ملح او لاء
وبعدها شوفي البطاط اذا هرستي وحده منهم تنهرس وياج




ثاني مشكلة :

الربيان لو شنو اسوي ربيان مشوي، مقلي، مربين، مرقة
الربيان يطلع مو شي يصير جنة بلاستيك ماني عارفى شنو اسوي بصراحة



الربيان يا قلبي ماينسلق على طول من تنضفينه على طول اطبخيه

يعني مثلالا اذا تبين تسوينه مشوي

سوي عندج خلطه على جنب مكوناتها

(سوس الصويا المعتدله- شويه كتشاب- شويه مايونيز- كركم-بقدونس مفروم ناعم-خل-ليمون-وشويه ليمون- وشويه لومي مطحون) << هذي خلطتي للشوي تهبل واضيف عليها شويه نعناع مجفف

وحطي الربيان كله داخل الصلصه وخليها تتنقع لمده ساعه تقريباا

واذا تبين تسوين مرق

اضيفي بصل ناعم وحطي الربيان بعد تنظيفه واضيفي كركم وحطي شبنت او بقدونس وشويه ملح وشويه لومي مطحون وغطيه انتظري شوي لما تشوفين الربيان بدى يطلع ماي وينشف يكون خلاص استوى


عفية الي تعرف شلون اقدر اتفادى هالمشاكل بالطبخ لا تقصر معاي

اي سؤال يا قلبي انا بالخدمه وان شاء الله تكوني فهمتي على شرحي :)

حبيبتي اذا تبين بهارات شغل عدل روحي مطحنة سمراء عدن بالديره صج ماكو مثل بهاراتهم
واخذي ملوت المرق وملوت الربيان وملوت البرياني والسمج والمجبوس وراح تدعيلي
اهو يعلمج كل شي وشوفي الزحمه عندهم ماشالله

حبيبتي مرق الدجاج سوي طريقتي وان شاالله ماراح تندمين
قلي الدجاج بالقدر لين يتحمر من الصوبين وبعدين حطي عليه البصل وقلبيه لما يتحمر شوي حطي الثوم وقلبيه عدل وبعدين حطي الملح والكركم والبهارات انواع واجد بالجمعيه وحطي ملعقتين وقلبيه عدل وحطي الخضره الي تبينه وحطي فلفل بارد ترى يهبل بالمرق وحطي معجون الطماط علبه وغطيه شوي بعدين صبي عليه الماي وخليه يطبخ لما يصير المرق رايب ثقيل وقصري النار وخليه على راحته وعاد انتي ذوقي الملح اذا زين او يبيله زياده اتزيدينه

والربيان حبيبتي يصير كانه علك لان الربيان كثر الطبخ يخليه يصير كذا

ماشاء الله على ردود البنات الله يعطيهم العافيه وما قصرو كفيتو وفيتو

موووووووفقه

اذا طحنتي بهاراتج بالبيت تعطيج طعم خياااااالي

انا كل شي اسويه بالبيت واسويه على قدي ما اطحن وااايد عشان ماتروح الريحه

جربي هالشي وادعيلي

هاذي مشكله طعم الاكل وحليناها

ثاني شي اذا حسيتي ان المرق ماي مايوه حطي عليه قفشة اكل كويكر بس قفشه 1 وراح تشوفين تقبه يصير حلو

ولازم تذوقين اكلج عشان تعرفين شنو المشكله

والمشكله الاخيره حلها جدا بسيط الربيان مايبيله طبخ وااايد عشان جذي يصير مثل البلاستك


وعقب هالنصايح ابي اشوفج طباخه .... :)

ان شاء الله استفدتي

ماقصروا البنات يعطيهم العااافية

والله اذا تبين نصيحه في مكانها
انصحج بالاتي .........

شوفي لج وحده طباخها يعجبج وقعدي يمها وهي تطبخ وهني راح تعرفين الطباخ العدل

ماقصرو البنات

فعلا البنات ماقصروووا ستات بيوووت ماشاالله