-()()[ إذا أكرمت الكريم ملكته ]()()-

السلام عليكم ورحمة الله وبركاته ..

-()()[ إذا أكرمت الكريم ملكته ]()()-

بصرااحه حيييل أعجبتني القصه فحبيت أنقلها لكم لتعرفون معنى الكرم والإخلاص والوفاء بين الأصدقاء ...



كان هناك شخصان سعودي وكويتي زملاء يدرسون في بريطانيا , وبعد انتهاء فترة الدراسه
قرروا يرجعون لاهلهم , فقال الكويتي للسعودي قبل ما تروح للسعوديه تعال معي
للكويت وبعدها روح للسعوديه , فوافق السعودي وهم في الطيارة رايحين للكويت

دق اخو الكويتي من الكويت وقال لاخوه ان يدتي توفت

فقال الكويتي لاخوه انا معاي زميلي من السعوديه وعازمه فلا تقولون له شي حتى
ما يضيق صدره ولا احرجه , نصلي على الجنازة وجنها لاحد من جماعتنا , لما وصلوا
وصلوا على الجنازة , وقعد السعودي له مدة في الكويت اعجبته بنت جيران الكويتي
وقال لزميله انا ودي اتزوج بنت جيرانكم شنو رااايك ؟
فرح الكويتي وقال انا مستعد اخطبها لك , وفعلا خطبها له وخبر السعودي اهله وسووا الزواج ورجع السعودي لديرته ,
وبعد مدة طويله كبرت تجارة السعودي وصار تاجر وغني , والكويتي خسر كل امواله وتجارته
فقال مالي الا اروح لصديقي السعودي اكيد بساعدني !!!
وفعلا راح السعوديه وهو منتظر شوفة زميله بفارغ الصبر , لما سال عنه ووصل لبيته لقاه مو بيت ساكن في قصر وتاجر , وكان الوقت متاخر فقال للبواب قول حق راعي القصر ان زميلك من
الكويت ( فلان بن فلان ) عند الباب وان محتاجك وايد وان حالته كذا وكذا

وبعد مارجع البواب

عطى الكويتي فضله عشى السعودي تخيلوا :?:


فضاق صدر الكويتي , وقال هذا جزاء الصداقه , المهم وهو راجع الديره بالطريج
لقى رجالين (من رجال الاعمال) يتراهنون على مليون اللي يجيهم الاول
بيعطونه المليون , وكان من حظ الكويتي انه هو اللي جاهم الاول واخذ المليون
وتاجر فيه بالسعوديه , وقبل ما يرجع للكويت لقى عجوز معاها بنت وقالتله

العجوز : يا وليدي طالبتك طلبه ولاتردني فيها لأن العمر بيد الله وانا حاسه أن منيتي قربت

ابي اخلي البنت عندك واروح احج اذا مارجعت تزوجها وخلها عند اهلك , ولما طولت العجوز عقب الحج اتزوجها وسوى حفله الزواج بالكويت , وفي اثناء الزواج وكان من ضمن الموجوديين السعودي

لما شافه الكويتي عصب والشرار طلع من عيونه :


وقال للحضور اطردوه هذا خاين العشرة والصداقه , تخيلوا انه لما وصل معي الكويت , وكانت يدتي ميته ما علمته عشان مايضيق صدرة علي , وخطبتله بنت الجيران اللي كانت بالاساس خطيبتي وفضلته على نفسي لأنها أعجبته وما حبيت اني اتزوج وحده ورفيج عمري عينه عليها , اللقمه كنا نتقاسمها ايام الغربه للأسف
ولما رحتله لين بيته محتاج عطاني فضله عشاااااااااااه


















تدرون شنو قال السعودي..؟



































قال اسمعوا واحكموا علي ...............انا يوم جاني الكويتي وهو محتاج
ماحبيت اشوفه على حالته هذي عقب ماكان تاجر وكبير اشوفه صغير ومحتاج واتفضل
عليه بشي من عندي عشان كذا عطيته فضله عشاي ... علشان ما اشوف حالته اللي وصفها لي البواب , ويزعل ويمشي بدون لا يلزم يشوفني ويشوف نظرات الشفقه بعيني , عقب ماكان مثلي الأعلى من أيام الدراسه

وبالنسبه للتاجرين اللي متراهنين على مليون , هذولي اخواني انا دازهم له عشان يفكون ضيقته ...


اما با النسبه للعجوز اللي معاها البنت فهذي امي والبنت هذي طبعا اختي


فشنو رايكم يحضر العرس السعودي يا جماعه ولا لأ ..؟



تحياتي للجميع ...:shades_smile: