انا عجبني رد بمنتدى ثاني وودي انقله لكم
في بيت الحمولة:
- زيجات الأبناء المتأخرة تتأثر بزيجات الأبناء الأوائل. إذا كانت زوجة الأول ربة بيت، فالثاني والثالث مايستطيعون الزواج من عاملة وإلا سيصبح هناك صعوبة شديدة في توزيع العمل بين الزوجات. هذا غير مشاكل المقتنيات وغيرها لأن كل واحدة بتتصرف على قد الدخل حقها فما رأيكم إذا صارت المقارنة 6000 مقابل 0 ريال سعودي؟
- نظام الأكل والجلسات بيتأثر حسب عادات أهل البيت. فمثلا، بيصير الحريم يأكلون مع بعض والرجال مع بعض طبعا، لأن البيت هذا له نظام، مهوب فندق كل واحد ياخذ زوجته ويطلع بها (للرف).
- الزوجات لازم ينظمون طلعاتهم، وحتى زياراتهم لأهلهم بحيث ما يفضى البيت. وهنا تأتي مشكلة الخلاف على عطلة نهاية الاسبوع. كل واحدة تريد أن تذهب لأهلها، وفي هذا الوقت تأتي بنات الحمولة لأهلهم ويصبح هناك فوضى لأن مدبرات البيت كلهن رايحات لأهلهن. ولابد من الضغط والتنظيم الصعب علشان ما يحدث هذا.
- معاملة الوالدين لزوجات الأبناء لازم تصير متوازنة، وكذلك لأحفادهم، والا تشعللت الشغلة.
- الأبناء المتزوجين لازم يكونون عاقلين وثقيلين وحكيمين، وإلا فالبيت بيتفركش من كثرة المشاكل. وكل واحد مايبي يصير أول يفرط العقد ويقال عنه إنها طلعته. لكن وش بيسوي لين كثرت الطنطنة.
- أوه نسيت ذي: الولد الأخير ويمكن اللي قبله لين جاء بيتزوج، بيتبهذل ما لقى اللي تقبله لأن سمعة أهل البيت بتصير ملح بين الناس. كل بيخاف من بيت الحمولة والبنات بيهجون عن البيت هذا خايفين من الزواج والصكة عليهم في هذا البيت. شقة والا مافيه
http://www.eqla3.com/file/ubb/smile.gif.
- مشتروات البيت راح تسوي مشكلة إذا ما كان فيه تخطيط، وإلا فالولد السنع بيفلس ماجاء آخر الشهر ولا بيروح فيها رصيد الشايب. إذا مافيه ميزانية منظمة ما راح تمشي الأمور صح.
- البيت المستقل حق شرعي من حقوق الزوجة ولا شك، لكن الكثير من البنات تتنازل عن هذا الحق بحثا عن الزواج، أو بحثا عن الزوج الصالح. ومعروف إن زوج صالح في حمولة أرحم من داشر والا سنسري في شقة ويجي كل ليلة من غير صواميل، والله يعافينا جميعا من البلاوي آمين.
- في بيت الحمولة، تشتهي وتأكل وتلبس وتشرب وتسافر وتتمشى وتنبسط وتزعل وتتصرف في كل شأن من شؤون حياتك بطريقة جماعية متوافقة مع الوسط اللي انت عايش فيه. بينما في البيت المستقل تفكر وتتصرف وتسوي كل الحاجات اللي فوق بطريقة خاصة فيك حسب اختياراتك أنت وزوجتك فقط. السبب هو التأثير الاجتماعي لمن حولك ممن لاتستطيع أن تعيش بينهم حياة خاصة بل أنت جزء من هذه المجموعة ولاتستطيع الخروج عن نظامها.
أخيرا، فقد جربت حياة الحمولة وحياة الاستقلال ودعوني أعترف لكم بأن حياة الحمولة أجمل وأفضل بمراحل. اتركوني من خرابيط وتفكير مرحلة العزوبية (وأبي أصير معها لحالي، ونبي ناخذ راحتنا). هذا كله شئ محدود. مع الحمولة، تحصل على الآتي:
- تربية أبناءك في بيئة جاهزة ما تحتاج تصنيع، ومن الغالب إنك تحب بيئة عائلتك اللي نشأت فيها وتعتبرها الأفضل (لكن فيه استثناءات).
- إذا جاء عندك سفر أو مهمة عمل، خل عيالك وما عليهم إلا العافية. المستقل ما يقدر يسوي كذا.
- السهر برا والخروج مع الزملاء مثال ثاني، ماتقدر تستمتع به إلا مع الحمولة.
- إذا انت رجال تحب القروش: تراك ساكن بلاش والأكل والشرب أسعاره مخفضة وبالسعر السياحي، والمصاريف بأسعار الجملة.
- وللي يحب الدراهم بعد
http://www.eqla3.com/file/ubb/smile.gif: ترا الضحية والفطرة على الشايب، هههههه.
- وللي دراهمه وسط: يقدر يتزوج ولو كان دخله محدود لأن كثير من المصروفات المعتادة ماراح يكون ملزوم فيها وراح تكون العايلة معه إلين يصلب عظمه، وهذي أفضل مميزات الزواج في بيت الحمولة. لايدفع إيجار وكثير من مصاريف البيت مشيوله عنه إلين يقوى عظمه. وهذا يساعد على الزواج المبكر اللي يشجع عليه ديننا. أما من يريد الاستقلال فما هنا عرس على طول
http://www.eqla3.com/file/ubb/smile.gif.
- إذا كانت الزوجة عاملة، فتراها بتنبسط لأن تقدر تحط شغالة وتخلي عيالها تحت عين جدتهم، وإذا كانت الجدة توها شادة حيلها خلتهم عندها. هذي ميزة ماتحصل إلا في بيوت الحمايل.
- الأبناء يطلع نموهم الفكري والاجتماعي أسرع لأنهم يحتكون بأبناء أعمامهم ويتعلمون منهم بسرعة.
- ولدك إذا دخل المدرسة (عارف بتقولون ذا مهوب صاحي بيقعد مع الحمولة إلين هالحين) ماراح يعاني من مشاكل المدرسة وعرابجتها. كلما تعرض له أحد فزعوا له عيال عمه.
أما المستقل فله مميزات:
حياة خاصة تصممها على كيفيك، وإن كنت من النوع الحساس أو الانعزالي فمالك إلا هذا النوع.
- تضبط مصروفاتك حتى لو كنت بتصرف أكثر لكنك على الأقل بتعرف وضعك.
- تحس بالمسؤولية أكثر.
- إذا كنت غير راضي عن الوسط اللي في الحمولة، بيكون لك المجال لتربية أبنائك بعيدا عنه.
- شغلة المطاعم ذي بعد يمدحونها مع إني ماجربتها. ما فيه أزين من طبخ أم العيال، وش لنا في بربسة أبو شكيم.
- الطلعات ماهنا حساب ولا محاسب.
- معاملة الزوجة بقرب أكثر وأسلوب أكثر حضارية وإيفاؤها حقوقها الشرعية بعيدا عن عين العادات والتقاليد الجامدة، هذا في نظري أكبر المكاسب لمن كان يخاف الله. في بيت الحمولة، ما تقدر تعامل مرتك معاملة زي ما تبي ولكن تعاملها تماما مثل مايعامل إخوانك زوجاتهم. أما المستقل فيعاملها كما يشاء وهذا فيه مجال للتفاهم أكثر.
أخيرا:
كل شئ له مميزاته ولا شك لكن كل واحد يقوس لحافه ويعرف الوضع اللي أحسن له