باقي لي يوم ،،، لو سمحتو بسرعة

وعليكم السلام والرحمة .. حياج الله اختي

بالنسبة للأسواق .. المجمعات >>> الأفينيوز (نفس تقريبا إمارات مول) يجمع الماركات والمحلات العالمية والعادية
وفيه الرخيص وفيه الغالي

المارينا مول (نفس مارينا ابو ظبي تقريبا نفس الجو) بس الغالب فيها المحلات العالمية الأمريكية البريطانية الخ

الكوت( نفس وافي تقريبا ) هدوء وفئة الناس اللي فيه غير عن المارينا والأفينيوز نسبيا .. بس القعدة بالمطاعم اللي فيه وايد حلوة وراقية على البحر


كويت ماجيك( نفس ابن بطوطه تقريبا بالتصميم) وتلاقين فيه وايد شغلات راح تعجبج .. اهلي اللي بالامارات يستانسون على البدل اللي فيه (في محل اسمه الأرجوان لا يطوفج) +الصنادل وانتي بكرامه حلوه هناك .. ذوقكم كلها كعوبه وشغل وايد


وفي بعد اذا انتي حابة مجمعات ( الفنار .. هم هادي وحلو وفيه محل قوتشي >>خابرتكم تحبونه وفيه محل ثاني اسمه سامبا هم فيه شنط أصلية .. هالمحلين بالفنار بالذات يسوون عروض وايد ..
وبنفس الشارع بتلاقين محلات ومجمعات وايد ..

انيي للأسواق العادية( للبجايم وأدري انها غرامكم) عندج سوق المعلم قولي للي يوصلج اللي على دوار الجوازات .. فيه محلات وااااااايد راح تعجبج .. وفيه ملابس كويتيه من اللي تحبونها بالامارات واييبونها لكم بالقرية العالمية ويبيعونها وايد غاليه؟؟

وعندج مجمع العربيد(أهو مجمع بمنطقة اسمها الفروانية بس بضاعته بضاعة سوق عادي مو محلات عالمية) وفيه دراريع وبدل حلوة وأسعارها حللللوه

سوق الديرة(المباركية) لا يطوفج ;) فيه كللللل شي تقريبا .. حوسي فيه واستكشفي كثر ما تقدرين .. احنا أهل الديرة لي يومج نستكشف :] وبغض النظر عن محلاته المتنوعه .. الجو فيه تحسينه جو تراثي كويتي بحت
يعني تحسين صج انج يايه الكويت :]

واذا تبين نفس طريقة سوق نايف وعكاظ .. روحي سوق اسمه الرجعان بمنطقة اسمها خيطان .. فيه وايد أسواق شعبية ومحلات هنود .. بس البضايع غير عنكم .. واذا تبين عبي .. العبي العادية طبعا مو مالت الزوارات
بتحصلينها رخيـــــــــــــــــــــصة وايد هناك .. وايد فرق عن اللي عندكم


امممم شنو بعد؟؟ اي المطاعم بشكل سريع (تعبت وانا اكتب بس ادعيلي يزاج الله خير :] )

شوكليت بار: كافيه بس فيه أكل لذيذ بعد .. بتاكلين فيه أحلى كاكاو تاكلينه بحياتج :)

فيلا فيروز : مطعم لبناني أكله رهيــــــــــــــب وفيه شيشه(أرجيله) اذا ريلج يشيش بس مو مدواخ :]
المدواخ شبه ممنوع عندنا :]


أبراج الكويت: وايد راح يستانسون فيه اليهال .. لانه تقدرين تشوفين معالم الكويت من فووووق :)


مركز سلطان: هذا بوفيه وموقعه على البحر .. حلو أكله ومتنوع.. بس روحوا مبجر قبل ما يصير وايد ناس ما تاخذون راحتكم

برج الحمام: على البحر بعد ,, وهم لبناني بس المنظر فيه روعه .. روحي وشوفي انتي وريلج وعيشوا جو مابي أحرق عليج ;)

ماكي : ياباني اذا تحبين اليايباني .. وايد متنو أكله .. المنيو فيه يشوّق


اممم تقريبا المطاعم الباجية اهي العالمية اللي عندكم منها .. وتقريبا هاللسته يبيلها اسبوع مو 3 أيام ,, ادعيلي يالغالية وسامحينا اذا منا قصور .. وحيـــــــــــــــــــــاج الله

ماقصرت اخت ليلى الانصارية كفت وفت/أنا أأيد سوق المباركية بس تعاليلها حزة المغرب عشان الجو
وبالنسبة للمطاعم أحب أضيف اذا تحبين الأكل البحري عندج مطعم النوخذة اللي بفندق كراون بلازا الفروانية

ياماما مطاعم عندج مغل محل قولي للتاكسي يوصلج منتشر بكل مناطق الكويت وخاصا الفحيحيل
و(العربيد) للدراريع - بالفروانية
بالكويت على 10 دنانير عندكم يعني 130 درهم الالالالالالالالالالا يطووفج كل الممثلات دراريعهم موجودة وخاصا أنسام الخلف
بالعربي يأخذون تصاميم المصممات ويطبقونها بأرخص الاسعااااااار

الاخت ليـــــــــــلى كفت ووفت

واحب ازيد عليها مطـــــــــــعم فــــــــــــريـــــــــــج صـــــــويــــــلـــــح لا يطوفج صج صج راح تنجنون على اكله طبخ كويتي 100%100

ورحله موفقه

ما قصروا البنات وحياج الله هني

تقدرين تدشين على الموقع وتشوفين معالم الكويت وكل شي موجود

وفعلا هالجو اليومين مو صادفي يوم غبار على رطوبه على شوية مطر
كله خير يارب

وبالنسبه للاسواق عندج ستي سنتر السالميه فيه دراعات وفيه ملابس اطفال ومكياج

والفنار والمهلب
والمكان الي فيه دراعات الحمرا مول بالفراونيه بس لا يقصون عليج بالاسعار ويزيدون

والكويت صغيره راح تزورين كل الاماكن ان شاء الله وتستانسين